خبر اور انشاء سے کیا مراد ہے؟

خبر اور انشاء سے کیا مراد ہے؟

سوال:
خبر اور انشاء سے کیا مراد ہے؟ مثالوں کے ساتھ بالتفصیل سمجھائیں۔


جواب:

جو کلام بالکل مکمل ہو اسے جملہ کہتے ہیں اور جملے کی دو قسمیں ہیں:
جملہ خبرئیہ ، جملہ انشائیہ
شعر میں خبریہ کی بنسبت جملہ انشائیہ لانا زیادہ بہتر ہوتا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جملہ خبریہ:
جس کے کہنے والے کو سچا یا جھوٹا کہہ سکیں ، مثلا اگر کسی نے مجھ سے کہا کہ میرا روزہ ہے تو میں کہہ سکتا ہوں کہ آپ سچ کہہ رہے ہیں اور یہ بھی کہہ سکتا ہوں کہ کیوں جھوٹ کہہ رہے ہو ، کچھ دیر پہلے ہی تو تمھیں پانی پیتے دیکھا ہے۔
۔۔۔۔۔۔۔۔۔۔۔۔۔۔۔۔۔۔
جملہ خبریہ کی دو قسمیں ہیں:
اسمیہ اور فعلیہ
جملہ اسمیہ وہ ہے جس میں خبر اسم ہو ، جیسے: “شیر خطرناک ہے”
جملہ فعلیہ وہ ہے جس میں خبر فعل ہو ، جیسے: “شیر دھاڑا”

حجاب اکسیر ہے آوارہٴ کوئے محبت کو
مری آتش کو بھڑکاتی ہے تیری دیر پیوندی (اقبال)
(پہلا مصرع جملہ اسمیہ ہے اور دوسرا مصرع جملہ فعلیہ)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جملہ انشائیہ:
جس کے کہنے والے کو سچا یا جھوٹا نہ کہہ سکیں ، مثلا اگر کسی نے مجھ سے کہا کہ “روزہ رکھیے” تو میں نہ یہ کہہ سکتا ہوں کہ آپ سچ کہہ رہے ہیں اور نہ یہ بول سکتا ہوں کہ “کیوں جھوٹ کہہ رہے ہیں” ، اسی طرح کوئی کہے کہ فضول خرچی مت کرو تو سننے والا یہ نہیں کہہ سکتا کہ سچ کہا یا جھوٹ کہا۔
۔۔۔۔۔۔۔۔۔۔۔۔۔۔۔۔۔۔
جملہ انشائیہ کی دس قسمیں ہیں:
امر ، نہی ، استفہام ، تمنی ، ترجی ، عقود ، ندا ، عرض ، قسم ، تعجب
۔۔۔۔۔۔۔۔۔۔۔۔۔۔۔۔۔۔
امر: کسی کام کے کرنے کا حکم کرنا ، جیسے: دیکھو

گیسوئے تابدار کو اور بھی تابدار کر
ہوش و خرد شکار کر ، قلب و نظر شکار کر
(اقبال)
۔۔۔۔۔۔۔۔۔۔۔۔۔۔۔۔۔۔
نہی: کسی کام کے نہ کرنے کا حکم کرنا ، جیسے: مت دیکھو

مت مردُمکِ دیدہ میں سمجھو یہ نگاہیں
ہیں جمع سُویدائے دلِ چشم میں آہیں
(غالب)
۔۔۔۔۔۔۔۔۔۔۔۔۔۔۔۔۔۔
استفہام: کچھ پوچھنا جیسے: کیا حال ہے؟

اگر کج رو ہیں انجم ، آسماں تیرا ہے یا میرا؟
مجھے فکر جہاں کیوں ہو ، جہاں تیرا ہے یا میرا؟
(اقبال کی اس غزل کے ہر شعر میں سوالیہ ردیف ہے۔)
۔۔۔۔۔۔۔۔۔۔۔۔۔۔۔۔۔۔
تمنی: کسی بات کی تمنا کرنا ، جیسے: کاش وہ آجائے

جانا پڑا رقیب کے در پر ہزار بار
اے کاش جانتا نہ تری رہ گزر کو مَیں
(غالب)
۔۔۔۔۔۔۔۔۔۔۔۔۔۔۔۔۔۔
ترجی: کسی بات کی توقع کرنا ، جیسے: شاید وہ آجائے

اندازِ بیاں گرچہ بہت شوخ نہیں ہے
شاید کہ اترجائے ترے دل میں مری بات
(اقبال)
۔۔۔۔۔۔۔۔۔۔۔۔۔۔۔۔۔۔
عقود: باہم کوئی معاملہ طے کرنا ، جیسے دولہا کا کہنا کہ مجھے قبول ہے۔

خطِ عارض سے لکھا ہے زلف کو اُلفت نے عہد
یک قلم منظور ہے جو کچھ پریشانی کرے
(غالب)
۔۔۔۔۔۔۔۔۔۔۔۔۔۔۔۔۔۔
ندا: کسی کو پکارنا ، جیسے: اے بھائی!

لا پھر اک بار وہی بادہ و جام اے ساقی!
ہاتھ آجائے مجھے میرا مقام اے ساقی!
(اقبال)
۔۔۔۔۔۔۔۔۔۔۔۔۔۔۔۔۔۔
عرض: کسی بات کی درخواست یا شکوہ کرنا ، جیسے: آپ آتے کیوں نہیں ہیں؟

قدر جانو کچھ ہماری ورنہ پچھتاوٴ گے تم
پھر نہیں ملنے کا تم کو کوئی ہم سا آشنا
(میر تقی میر)

پریشاں ہو کہ میری خاک آخر دل نہ بن جائے
جو مشکل اب ہے یارب! پھر وہی مشکل نہ بن جائے
(اقبال)
۔۔۔۔۔۔۔۔۔۔۔۔۔۔۔۔۔۔
قسم: قسم کھانا ، جیسے اللہ کی قسم!

اس کا خیال چشم سے شب خواب لے گیا
قسمے کہ عشق جی سے مرے تاب لے گیا
(میر تقی میر)

بس اب بگڑے پہ کیا شرمندگی، جانے دو، مل جاؤ
قَسم لو ہم سے گر یہ بھی کہیں کیوں ہم نہ کہتے تھے
(غالب)
۔۔۔۔۔۔۔۔۔۔۔۔۔۔۔۔۔۔
تعجب: کسی بات پر حیرت و تعجب کا اظہار کرنا ، جیسے: کتنا خوبصورت ہے!!

یہ مسائل تصوف یہ ترا بیان غالبؔ
تجھے ہم ولی سمجھتے جو نہ بادہ خوار ہوتا
(غالب)

نہیں اس کھلی فضا میں کوئی گوشۂ فراغت
یہ جہاں عجب جہاں ہے ، نہ قفس نہ آشیانہ
(اقبال)

طالبِ دعا:
محمد اسامہ سَرسَری